12 ene. 2018

Debate "O Marín que queremos"

Debate "O Marín que queremos"
Día: 19 de xaneiro
Hora: 20h
Lugar: Museo Manuel Torres
Organiza: Club de Opinión Portocelo
O Club de Opinión 'Portocelo' abre as súas actividades para este exercicio o próximo venres día 19, ás 20.00h no Museo M. Torres, cunha charla-coloquio aberta á cidadanía sobre a política municipal, na que baixo o lema 'O Marín que queremos', intervirán Xosé Emilio Dopazo Recamán (Ldo. en Económicas. Economía Pública) que presentará a súa poñencia 'Ensanche Marín 2020. Abrir Marín ó mar' e Antón Pousada (presidente do colectivo cultural 'Ronsel'; ex Profesor de Tecnoloxía e ex concelleiro) que falará sobre 'Seixo, outra realidade'. En ambas poñencias faise referencia ás demandas sobre as que veñen insistindo os marinenses nos últimos meses como o Auditorio, o destino da Casa do Mar, o Pavillón de Deportes de Seixo, infraestruturas para os deportes náuticos,  un plan director para a Lagoa de Castiñeiras, etc. 
O coloquio será dirixido polo presidente do foro de opinión Angel G. Carragal e  desenvolverase a modo de coloquio aberto no que poderán participar todas as persoas que asistan se o desexaren. Neste sentido a organización fai un especial chamamento a  representantes do asociacionismo marinense de representantes políticos para que participen no coloquio, acheguen e intercambien as súas opinións e experiencias ao debate. 

Presentación de GZmúsica e Ouve!

Presentación de GZmúsica e Ouve!
Día: 12 de xaneiro
Hora: 20h
Lugar: Museo Manuel Torres
Organiza: Asociación Queremos Galego Marín
A Asociación Queremos Galego Marín presentará o venres 12 de xaneiro ás 20h no Museo Manuel Torres a web GZMúsica e o fanzine sobre a música galega Ouve!
A Asociación Queremos Galego Marín comeza o ano 2018 cunha actividade relacionada coa música galega no marco dunhas xornadas que se levarán a cabo durante todo este ano tituladas “o galego máis alá da literatura”.
Nun acto que se celebrará ás 20h no Museo Manuel Torres de Marín a asociación presentará dúas iniciativas de comunicación ao redor da escena musical galega como son a web GZMúsica e o fanzine Ouve!
GZMúsica é unha web nada no 2012 que se adica á música galega e pretende achegar información sobre todo o que acontece arredor das músicas do pais. Unha web onde se poden atopar desde calendarios de concertos, entrevistas, videoclips ata resumos de distintos festivais musicais que se celebran ao longo e ancho do país.
Ouve! é un fanzine en papel que se distribue desde hai case un ano de xeito gratuíto polos locais do país para falar da música galega con crónicas de concertos, críticas aos novos discos dos distintos grupos galegos.
Hai xa ben tempo que a música galega é algo máis que a música folk e as gaitas dos grupos tradicionais. Na actualidade a escena musical galega malia as súas limitacións ferve en festivais, en grupos de música que van desde o pop, o hip hop, garaxe, ata o punk, rapcore ou metal. Se non hai tantos anos eran os Diplomáticos de Monte Alto, Lamatumba, Dios Ke te Crew ou os Heredeiros da Crus eran os grupos de moda, agora cantantes coma Ses, grupos como Nao, Ezetaerre, Familia Caamagno ou Terbutalina enchen as salas de música e os festivais de seareiros que demostran o potente que é a nosa escena.
Para nos falar destes dous proxectos e do panorama musical galego a Asociación Queremos Galego Marín contará coa presenza de Dani Lavesedo fundador tanto de GZMúsica como de Ouve! e gran coñecedor do panorama musical galego.

28 dic. 2017

Homenaxe ás persoas asesinadas o 31 de decembro de 1936

Homenaxe ás persoas asesinadas o 31 de decembro de 1936
Día: 31 de decembro
Hora: 13h
Lugar: Paseo Antonio Blanco
Organiza: Asociación pola Recuperación da Memoria Histórica de Marín
O domingo 31, a partir das 13 h., terá lugar no Paseo Marítimo “Antonio Blanco” o tradicional acto de homenaxe e lembranza das persoas asasinadas por defender a liberdade, no 31 de decembro do ano 36. Intervirá o historiador e catedrático de xeografía e historia Francisco Calo Lourido (investigador no campo da antropoloxía e da arqueoloxía), e realizarase a anual ofrenda floral. Contaremos coa ambientación musical a cargo da agrupación Os Amigos Gaiteiros.

Conferencia “A represión franquista en Galicia. Algunhas claves interpretativas”

Conferencia “A represión franquista en Galicia. Algunhas claves interpretativas”
Día: 29 de decembro
Hora: 20h
Lugar: Museo Manuel Torres
Organiza: Asociación pola Recuperación da Memoria Histórica de Marín
O venres, día 29, o profesor Julio Prada Rodríguez ofrecerá a conferencia “A represión franquista en Galicia. Algunhas claves interpretativas”. Comezará ás 20 h. no Museo Manuel Torres.
Julio Prada Rodríguez é profesor titular de Historia Contemporánea na Universidade de Vigo, secretario do Centro Asociado da UNED de Ourense e licenciado en Dereito. Está especializado no estudo da violencia política, o primeiro franquismo (a II República, a guerra civil e a represión) e a transición á democracia; conta cunha ampla e intensa traxectoria na investigación, tendo dirixido varios proxectos e publicados unha vintena de libros, ademais de numerosos artigos e participacións en congresos. Foi Premio de Investigación Histórica de Galicia “Antonio Fraguas” e é considerado como un dos máis recoñecidos investigadores en Galicia.

22 dic. 2017

Chegada do Apalpador a Marín

Chegada do Apalpador a Marín
Día: 31 de decembro
Hora: 17h
Lugar: rúas de Marín
Organiza: Almuinha, Gharaboto e Asociación Marinense de Artesáns
A asociación Almuinha conxuntamente coa asociación Gharaboto e a Asociación Marinense de Artesáns organiza a chegada do apalpador a Marín para o vindeiro domingo 31 de decembro.
Ese domingo, o apalpador percorrerá a partir das 17h as rúas da vila acompañado do seu grupo de músicos (Os de Marín) e achegarase a toda a rapazada para repartir doces. Ás 18h chegará á carpa da Feira de Artesanía na Alameda Rosalía de Castro onde entregará os premios do III concurso de debuxos “Debuxando o apalpador”.
Para que a espera sexa máis levadeira, na carpa da Feira de Artesanía estará instalado o posto do apalpador, onde se atopa unha imaxe xigante do carboeiro para que así quen o desexar, poda tirar unha foto facendo de apalpador.


21 dic. 2017

Homenaxe na Raña da APRMHM

Homenaxe na Raña da APRMHM
Día: 23 de decembro
Hora: 12h
Lugar: Museo Manuel Torres
Organiza: Asociación pola Recuperación da Memoria Histórica de Marín
Este sábado, día 23 de decembro, a Asociación pola Recuperación da Memoria Histórica de Marín organiza un acto ás 13 h que consistirá na colocación dunha placa no muro do cemiterio de A Raña, para sinalar este lugar da memoria.
Entre os diversos sucesos acaecidos na contorna, a APRMHM lembra un especialmente tráxico: o 7 de decembro de 1936 aparecen os corpos dos veciños da vila de Bueu Francisco Escáneo Franco​ e Francisco García Villanueva, concelleiros, e de Xacinto Lamosa Novas, Xosé Seixas Camiña e Xulio Castro Martínez, dirixentes obreiros; asasinados nas inmediacións do cemiterio municipal de Marín.
Antes do citado acto, ás 12 h. no Museo Manuel Torres, a Asociación Amigos de Johan Carballeira, de Bueu, presentará o traballo de investigación "Crónica da represión en Bueu no golpe militar do 36".

11 dic. 2017

Xornadas de memoria histórica

A Asociación pola Recuperación da Memoria Histórica de Marín presenta o programa de actividades e actos para este mes de decembro, no que se cumpren 10 anos da súa creación.
Comezará coas XORNADAS DE MEMORIA HISTÓRICA, organizadas xunto coa Fundación Alexandre Bóveda e coa especial colaboración do Instituto Galego de Historia (Igalhis), que terán lugar os días 14, 15 e 16 .

O xoves 14, ás 20 h. no salón de actos do IES Illa de Tambo, a compañía Avelaíña Teatro porá en escea a obra “A Lola”, que representa a todas as mulleres que sobreviviron aos seus maridos, arrebatados polo terror franquista.
O venres 15, ás 18:00 h. no Museo Municipal Manuel Torres, o profesor da Universidade da Coruña Carlos Velasco Souto, iniciará o ciclo de conferencias coa ponencia “1931-1936. República e tecido social e político”. Ás 18:30 h.  Xoán Carlos Garrido Couceiro, investigador e membro da Iniciativa Galega pola Memoria, falará sobre “1931. A proclamación da República Galega” e a catedrática da Universidade de Santiago de Compostela Aurora Marco pechará esta primera parte, ás 19:00 h., con “1931-1936. Mulleres na Galiza republicana”.
A partir das 20:00 h., terá lugar a presentación do traballo de investigación “Memorias de sal e terra. O ensino no concello de Marín (1867-1940)”, de Xosé Manuel Moreira Docampo e Celso Xavier Milleiro Sánchez, editado pola Deputación de Pontevedra. Ademais dos autores, intervirán Xosé Leal, deputado provincial de Cultura e Lingua, e Enriqueta Otero, presidenta da ARMH de Marín.
Na mañán do sábado 16,  a partir das 10:30 h.,reanudarase no Museo Municipal o ciclo de conferencias coa ofrecida polo catedrático de Historia do Ensino Medio Bernardo Máiz Vásquez, baixo o título “1936. Golpe militar e represión contra a República”. A continuación, o docente e investigador Xosé Álvarez falará do “Golpe militar e represión franquista e Pontevedra e a súa bisbarra”, para rematar coa ponencia de Uxío-Breogán Diéguez Cequiel, profesor da Universidade da Coruña, sobre “1936\39-1950. O exilio galego alén do mar na súa primeira etapa”.
O peche destas Xornadas de Memoria Histórica será a presentación, ás 13:00 h., do libro “ Meirás, un pazo, un caudillo, un espolio”, de Manuel Pérez e Carlos Babío e editado pola Fundación Galiza Sempre.

COLOCACIÓN DE PLACA CONMEMORATIVA
O sábado 23, ás 12:00h. no Museo Manuel Torres, Xosé Novas Piñeiro e Manuel Antón Mosteiro García, da Asociación Amigos de Johan Carballeira, presentarán o traballo de investigación “Crónicas da represión en Bueu no golpe militar do 36”.
Limiar da publicación:
Estas crónicas da represión en Bueu no golpe militar do 36, agrupan a revista editada no 2007 revisada, a revista editada no 2012, xunto con unha cronoloxía da represión en Bueu no primeiro ano despois do golpe e fotos de veciñas rapadas.
…..// Sirva como homenaxe aos que sufriron defendendo a democracia e as liberdades..

A continuación, ás 13:00h. no Cemiterio de A Raña, terá lugar o acto de inauguración da placa conmemorativa colocada como “lugar de memoria”, en lembranza das persoas que alí sufriron a represión franquista.
Entre os diversos sucesos acaecidos na contorna do cemiterio de A Raña, temos un especialmente tráxico e os seus tristes protagonistas eran veciños da vila irmán de Bueu.
O 6 de decembro de 1936 o concelleiro Francisco Escáneo Franco é encarcerado no calabozo de Bueu canda outros veciños. Conseguen fuxir pero volven a ser detidos esa mesa noite e asasinados nas inmediacións do cemiterio municipal de Marín. O 7 de decembro aparece o seu corpo cando o do concelleiro Francisco García Villanueva e dos dirixentes obreiros Xacinto Lamosa Novas, Xosé Seixas Camiña e Xulio Castro Martínez.

PECHE DOS ACTOS DE 2017
O profesor de historia contemporánea da Universidade de Vigo, Julio Prada Rodríguez, ofrecerá a conferencia “A represión franquista en Galiza. Algunhas claves interpretativas”, o venres 29 ás 20:00 h., tamén no museo municipal.
E cerrando os actos do 2017, a Asociación pola Recuperación da Memoria Histórica de Marín, como cada último día do ano, lembrará aos executados do 31 de decembro de 1936, no paseo Alcalde Antonio Blanco, a partir das 13:00 h. Contaremos, nesta ocasión coa intervención de Francisco Calo Lourido, catedrático de Xeografía e Historia e investigador.





30 nov. 2017

Teatro “Ai Carmela”

Teatro “Ai Carmela”
Día: 1 de decembro
Hora: 20h
Lugar: Local do Ateneo Santa Cecilia
Organiza: Ateneo Santa Cecilia
Dentro das actividades programadas polo Ateneo para celebrar o 65 Aniversario este venres día 1 de decembro as 20h , o grupo Petanaporta Teatro ofrécenos a obra "Ai Carmela", cos interpretes Paco Pernas no papel de Paulino e Mercedes Pardavila no de Carmela. Dirección de Diego Rey e baseado no texto orixinal de Sanchis Sinisterra. Nas tarefas técnicas de luz e son Sergio Alfonso Agra.
A representación será no novo Local do Ateneo, Rúa do Forno nº42, baixo.
Trátase de unha obra cuxos persoaxes son tratados con moita delicadeza e cariño, representantes das tres Españas, a dos vencedores, obvia e sempre presente e duas Españas que asumiron a derrota de duas maneiras diferentes. Unha representada por Carmela que acaba morta e outra sobrevivinte representada por Paulino que acaba asumindo o sometemento e perda dos seus ideais disposto inclusive ao esquecemento.

22 nov. 2017

Xornadas pola protección e posta en valor do patrimonio de San Xián

Xornadas pola protección e posta en valor do patrimonio de San Xián
Día: 24 de novembro
Hora: 19:30h
Lugar: Adega da Capeleira
Organiza:
Asociación Monte Pituco e a Plataforma en Defensa dos Montes do Morrazo
A Asociación Monte Pituco e a Plataforma en Defensa dos Montes do Morrazo organizan unhas “Xornadas pola protección e posta en valor do patrimonio de San Xián” no marco do Día Internacional do Patrimonio, que se celebra este 16 de novembro. A iniciativa forma parte da convocatoria feita a nivel autonómico pola Rede do Patrimonio Cultural, cun total de 40 actividades promovidas por unha trintena de colectivos de toda Galicia.
Os actos programados en Marín son unha conferencia do experto en patrimonio, investigador e divulgador Antonio Costa co lema “Técnica da reconstitución dixital 3D aplicada aos petróglifos de San Xián”, que se realizará o venres 24 a partir das 19:30 horas na Adega da Capeleira de Marín (Rúa do Forno 23); seguiralle ao día seguinte unha andaina con saída ás 10:00 horas dende o adro da igrexa de San Xián, percorrendo os lugares de A Carrasca, Champás, o rego de Castiñeiras e Pelagartos, para finalizar sobre as 14:00 horas no punto de inicio da ruta.
A parroquia de San Xián conta cun importante e variado patrimonio cultural e arqueolóxico que vai dende o Neolítico ata a Era Moderna. A ‘barferencia’ que protagonizará Antonio Costa o venres 24 permitirá apreciar -con imaxes en tres dimensións procesadas a través dun novidoso sistema informático- diversos gravados rupestres da Idade do Bronce, especialmente algúns dos novos xacementos descubertos polo marinense Paulo Troitiño no conxunto rupestre da Carrasca, cuxa existencia foi notificada á Dirección Xeral do Patrimonio Cultural da Xunta para a súa catalogación. Entre eles atópase unha figura con forma reticular; a única da que se ten constancia da súa conservación na bisbarra do Morrazo.
Precisamente, os petróglifos da Carrasca e de Champás, datados hai 4000 anos, formarán parte do itinerario da ruta de sendeirismo que haberá o sábado 25, coa que se pretende concienciar a veciñanza sobre a riqueza da parroquia de San Xián como unha das contornas de maior densidade e diversidade de petróglifos prehistóricos non só do Concello de Marín, senón da península do Morrazo.
Situados entre as concas dos regos de Castiñeiras e da Agrela, entre os 235 e os 345 metros de altitude sobre nivel do mar, estes xacementos arqueolóxicos abranguen seis estacións rupestres no caso da Carrasca e tres no de Champás. Os elementos representados son variados –círculos concéntricos, coviñas ou cazoletas, armas, figuras zoomorfas e reticulares, entre outros motivos- e ademais seguen atopándose novas rochas con gravados dos que non había constancia. Con toda probabilidade, o patrimonio da parroquia de San Xián siga aumentando con máis descubrimentos.
As paraxes naturais onde se atopan -pequenos outeiros, camiños e corredoiras entre a matogueira ou preto de zonas húmidas e na ribeira fluvial- resaltan polo seu valor paisaxístico dentro dunha área de gran valor ambiental pertencente ao Espazo Natural dos Montes do Morrazo, en solo rústico de especial protección de espazos naturais, segundo as Normas Complementarias e Subsidiarias de Planeamento da provincia de Pontevedra.
Malia que os xacementos documentados están inventariados e catalogados como Bens de Interese Cultural, coa máxima figura de protección a nivel autonómico, a lei non se está aplicando na maioría dos casos e moitos dos elementos están sendo afectados no seu ámbito de protección por distintas causas -desbroces, apertura de pistas forestais, paso de maquinaria pesada, eucaliptización- como xa denunciaron varios colectivos en xaneiro deste ano a causa dunha agresión no grupo número 5 do conxunto rupestre da Carrasca.
Outro dos obxectivos desta andaina é reivindicar a posta en valor dos conxuntos rupestre da Carrasca e de Champás, descoñecidos pola cidadanía, pola veciñanza da parroquia de San Xián e mesmo polos responsables da súa conservación. Amosando e divulgando os incuestionables valores culturais e ambientais destas paraxes, a Asociación Monte Pituco e a Plataforma en Defensa dos Montes do Morrazo apelan ás Administracións autonómica, provincial e local, así como á Comunidade de Montes de San Xián, para que A Carrasca e Champás formen parte da necesaria conexión co corredor ambiental e cultural entre o Espazo Natural e Arqueolóxico dos Sete Camiños e o Parque da Natureza do Lago de Castiñeiras.
Ademais dos xacementos da Carrasca e Champás, tamén destacan polo seu interese os petróglifos da Idade do Bronce de Briasco e da Carballeira do Rei; asimesmo, pola súa particularidade, os gravados modernos realizados ao longo do século pasado polo marinense José Meijón. Dende o punto de vista etnográfico, a ruta tamén fará fincapé no valor das corredoiras tradicionais que atravesan entre os vales e os montes da zona, na singularidade do muíño do Sacristán, cunha monumental canle e cubo en forma de valo, xunto coa súa presa de auga e os muíños, fonte e lavadeiro do Briasco.
A nivel ambiental e paisaxístico salienta o lugar de Pelagartos, onde se atopou un asentamento humano da Idade do Bronce. Trátase dun dos achados de máis antigüidade da parroquia, moi anterior ao histórico igrexario moderno e barroco de San Xián dos Encoirados, que conforma o núcleo parroquial dende o Medievo e onde se atopan os alicerces da actual vila de Marín. Pola súa importancia ambiental non faltará a visita ao rego de Castiñeiras, leito principal do rego Lameira e fornecedor de recursos hídricos a nivel local dentro dunha parroquia que aínda conserva bastantes cualidades do seu carácter rural e agropecuario.


13 nov. 2017

Homenaxe a Manoel Cambeiro Suárez

Homenaxe a Manoel Cambeiro Suárez
Día: 23 de novembro
Hora: 20h
Lugar: Biblioteca de Marín
Organiza: Club de Opinión Portocelo
O Club de Opinión Club 'Portocelo' organiza unha homenaxe ao poeta, compositor e escritor, Manoel Cambeiro Suárez, que foi nado en Marín en novembro de 1920 e morreu en Vigo no mesmo mes de 1999.
Segundo o presidente do foro de opinión marinense Angel G. Carragal, "Cambeiro merece o recoñecemento de todos os marinenses polo importante legado cultural que deixou parte del dedicado a Marin. Os seus poemas 'Onde estarán as roseiras?’, 'Relembranza ou Dr. Touriño'; 'A Praza da Veguiña', son algunhas das mostras da paixón que sentía polo seu pobo. Seus acrósticos e poemas en galego ( 'Rosalía de Castro', 'O meu amigo', 'Miña Galicia') foron eloxiados por intelectuais como Filgueira Valverde, Otero Pedrayo e Álvaro Cunqueiro "
Os actos do memorial terán lugar o xoves día 23 as 20.00h na Biblioteca Pública Municipal nos que intervirá, o fillo do homenaxeado, profesor de composición, Carlos Cambeiro Alís que falará sobre a vida e obra do seu pai a través de notas biográficas e documentación diversa.
Haberá tamén un recital poético e a actuación da coñecida soprano viguesa Beatriz Riobó acompañada ao piano por Enrique Goberna tamén vigués que interpretará 'Miña nai, miña Vellina' (letra de Manuel Cambeiro e música de Carlos Cambeiro). O acto terminará coa entrega da distinción póstuma ‘IX Centenario de Marín’, da que están en posesión outros escritores e historiadores marinenses. A entrada é gratuíta.